Педагогикалық кеңесте «Біртұтас тәрбие бағдарламасы: жаңартылған мазмұны және енгізу алгоритмі» туралы мектеп директорының тәрбие ісі жұмысының орынбасары Адилова Г.С. атап айтып кетті. «Біртұтас тәрбие» бағдарламасының жаңартылған мазмұны, құндылықтар жүйесі, тәрбие үштағанының идеологиясы, түйінді идеясы, іске асыру механизмдері мен әдіснамалық негіздері туралы ақпарат берілді.
Біртұтас тәрбие бағдарламасының жаңартылған мазмұнының мақсаты - білім алушылардың жан-жақты дамуына бағытталған тәрбие үдерісін тиімді ұйымдастыру және оны қазіргі заман талаптарына сай жаңарту. Бұл бағдарламаның негізгі мақсаттары:
- Жан-жақты тұлғаны қалыптастыру - оқушылардың интеллектуалдық, әлеуметтік, рухани, моральдық, шығармашылық, физикалық және еңбек дағдыларын дамыту арқылы толыққанды тұлғаны тәрбиелеу.
- Ұлттық және жалпыадамзаттық құндылықтарды қалыптастыру - қазақстандық патриотизм, ұлттық мәдениетті сақтау және дамытуды, сондай-ақ әлемдік деңгейде қабылданған құндылықтарды ұстануды қамтамасыз ету.
- Сенім мен жауапкершілік сезімін дамыту - оқушылардың өз таңдауына, әрекеттеріне жауапкершілікпен қарауын, әлеуметтік ортада дұрыс шешім қабылдай білу дағдыларын қалыптастыру.
- Құқықтық тәрбие беру - оқушыларға құқықтық білім беру арқылы өз құқықтары мен міндеттерін білу, заңға құрметпен қарау және азаматтық жауапкершілікті сезіну.
- Жеке тұлғаның әлеуметтенуі - білім алушылардың қоғамға интеграциялануы, өз орнын табуы, түрлі әлеуметтік топтармен өзара әрекеттесу дағдыларын дамыту.
- Көшбасшылық және коммуникация дағдыларын қалыптастыру - оқушылардың көшбасшылық қабілеттерін арттыру, топта жұмыс істей білу, тыңдау және пікір білдіру дағдыларын дамыту.
Жаңартылған мазмұндағы тәрбие бағдарламасы оқушылардың ойлау деңгейін көтеруге, өз қабілеттерін ашуға, сондай-ақ білім мен тәрбие арасындағы үйлесімді байланысты нығайтуға бағытталған.
